政Whats噏:佔領結束3年 岑敖暉終認美籍

20180123
東網電視
更多新聞短片
岑敖暉承認自己擁有美國護照。(設計圖片)

2014年佔領行動爆發期間,外界一直盛傳多名學生領袖擁有或已獲預留英國、美國護照,但部分人一直三緘其口。佔領行動結束逾3年後,其中一名「雙學」領袖、學聯前副秘書長岑敖暉,終於承認擁有美國護照,但佢冇講清楚護照係幾時取得。

因傳統泛民同本土自決派近日就立法會九龍西補選嘅「Plan B(後備)」人選問題爭拗不絕,其中一名被點名人選就係岑敖暉。佢尋晚(22日)接受傳媒查詢時表明無意參選,並首次證實自己擁有美國護照,唔可能喺補選提名期結束前完成放棄護照手續,但佢同時強調護照問題並非自己拒絕參選嘅原因。

其實喺佔領行動爆發期間,學聯派出時任學聯秘書長嘅周永康、時任常務秘書鍾耀華同時任常委嘅羅冠聰,上京向領導人表達對政改嘅訴求,但時任學聯副秘書長嘅岑敖暉並冇同行,而學聯三子最終「闖關」失敗。當時已有消息指岑敖暉原本有意赴京,但有傳佢持有美國護照,避免一旦被拒入境時被拘留,甚至引發外交風波,因此佢放棄訪京意願,決定留守香港,負責學聯運作。

除咗岑敖暉之外,同樣喺3年後先自爆有外國國籍嘅仲有香港眾志常委周庭。喺佔領行動中擔當領導團體嘅「雙學」,包括咗學民思潮,周庭喺佔領行動中期突然以「身心疲累」、「無法承受如此承重的壓力」為由辭去學民發言人一職。然而喺佔領行動後,學民解散,周庭又與包括黃之鋒在內嘅多名學民核心成員合組眾志,而佢喺上周報名參選立法會港島區補選當日,先展示放棄英籍嘅文件。已報名參與港島區補選嘅仲有新民黨陳家珮。

此外,岑敖暉嘅戰友周永康尋晚喺社交網站上載一張同本土民主前線前召集人梁天琦嘅合照,指雖然自己屬於「左膠」,梁天琦則屬本土派,但佢仍對對方因旺角暴動案而收押感到難過。佢又暗批部分民主派近日只顧爭論「Plan ABCDEFG」問題,未有再積極支援梁天琦等在囚社運人士。