搜查線：90後平板手繪　重現經典電影油畫海報

畫出主角神髓的油畫風手繪人像、用舊式字體畫在旁邊的小標語、各大舊院線的名字、山水背景，再加上「溫打烏文」（神奇女俠）、「拜打文」（蜘蛛俠）、「鬼佬張保仔」（魔盜王）等讀出來就會知其義的名稱，張張電影海報感覺新鮮，卻又不失懷舊感。這些電影作品都是近年才拍攝，海報當然不可能是數十年前、手繪海報時代的作品，這些在網絡爆紅的海報，其實都是出自22歲的設計師林嘉恒（恒仔）手筆。

年輕如恒仔，當然沒經歷過電影院外掛上大大幅手繪海報的年代，會令他開始畫懷舊海報的，是海報師阮大勇的展覽：「我覺得佢可以將一套電影嘅演員、佢哋嘅表情、動作......總之成套電影，佢可以濃縮到畫晒喺一張海報入面。我覺得佢好犀利，好欣賞佢。」在電腦合成成為主流的現在，人手繪製電影海報實屬罕見，而其背後所需的心血亦是吸引恒仔的原因之一。

從模仿開始，一直搜集資料研究舊海報，再用較為方便的平板電腦手繪，直至去年6月，恒仔終於在本來主力繪畫人像的社交平台專頁「無紙用」上載了第一幅懷舊電影海報。「因為嗰時其實都幾灰，畫咩（人像）作品擺上去都係『係咁啦』、『冇乜特別呀』。」恒仔憶述，上載完那張「溫打烏文」後，到翌晨才發現有幾千人「Like」，專頁更多了人留意。

「我覺得呢樣嘢原來都幾多人關注，同埋都好多人收藏呢啲舊電影海報。佢哋見到呢啲新嘅電影用咗舊嘅風格嚟畫，自然覺得好特別好新鮮。」網絡世界原來真的高手處處，恒仔說不少網民對舊海報都相當有研究，甚至會提醒他文字該如何排版、哪條院線才是正確。

看完電影，再花幾個小時構思，到畫好一幅海報需時兩、三天，一年內恒仔已畫了17幅作品。不過除了設計的正職，他有時還要兼顧額外工作，這些海報只能在不多的空餘時間畫。這樣看來，恒仔的生活總是在畫畫，畫畫對他來說不只是從小的興趣：「我覺得唯獨畫畫可以令到我做到，同表達到我想做嘅嘢。」

「小學、中學我讀書都好差，記性好差。」成績差、甚至需留級的原因不在於他不努力，而是特殊學習困難，密密麻麻的字在恒仔眼中會「飛來飛去」，令他無法讀完一篇完整的文章。

中三見家長時，老師說他未必適合就讀傳統學校，問恒仔的父親會否為他另覓學校：「嗰時我其實好驚，我覺得：『嘩！我咁快畀人踢咗出學校，而家個前途又唔知點樣咁，咁我點算呢？』」

「我爸爸喺我讀中學、小學嗰陣麻麻哋，覺得畫畫冇乜作為，唔知做乜咁。自從我畀人踢咗出學校之後，佢就開始諗通咗，覺得不如我唔係讀得書嘅，就試下畀我做鍾意做嘅嘢啦。」加上母親的支持，恒仔後來轉到一所藝術學校就讀，亦令今天的他可向藝術設計方面發展。

畫了舊式電影海報約一年，恒仔謙稱自己仍未將之研究得透徹，但希望終有一天能教小朋友畫舊式海報，以及為電影畫出一幅真正的宣傳海報。談到如果是他喜歡的英雄片會否更好，本來言談沉穩的他露出了興奮的神色：「如果下一套呢啲復仇者聯盟，無端端喺香港張海報係用呢啲風格嘅，我就覺得係有史以嚟最特別嘅海報！」