政Whats噏：太太第4胎又係女？楊哲安話似

山頂區區議員楊哲安(Jeremy)已經生咗3位千金，依家太太楊張新悅有咗第4胎，到底係囝定係囡，真係政界熱話。Jeremy今日(27日)出席自由黨新春團拜時話，聽人講如果係仔，太太個肚應該會尖啲，又會出暗瘡，但今次睇太太狀況，同以往生3個女嘅經驗差唔多，估計都似生女喎！佢之後陪太太去產檢，到底結果係仔定女呢？佢就唔肯講嘞。

唔知佢嘅爸爸、前立法會議員楊孝華有冇畀壓力佢哋，要一定要生個仔呢？Jeremy就話，都生咗咁多個，「係都畀我阿哥先啦」。原來連佢哥哥屋企都係生女，即係楊孝華目前只有孫女，Jeremy話，其實爸爸唔介意佢哋生仔定生女，完全冇畀壓力佢哋，相當開通。

Jeremy又提到，最近太太睇完佢啲相後，覺得佢個樣唔掂，叫佢要敷番多啲mask，佢就反駁太太，自己又唔係即將選舉喎！