政Whats噏：劉業強、劉國勳工作報告鬧雙胞

不少立法會議員會出版年度工作報告，向選民交代議會業績，有政圈人士發現，身兼鄉議局主席的劉業強，和民建聯劉國勳的議員工作報告，不論封面、用色和排版等，都好相似，唔通２人心有靈犀？

劉業強和劉國勳兩人的報告，封面同樣選擇在立法會大樓５樓室外平台，幾乎同一位置；而兩人同樣穿上藍色西裝褸；標題同樣是藍底白字；副題「工作報告」等字眼完全一樣；甚至連立法會和各自黨徽的擺放位置都同樣設於右上方。至於報告內文，其實兩者內容和排版都不盡相同，未如封面般「撞得咁應」。

由於劉業強的報告先出版，據悉有人不滿劉國勳涉嫌連工作報告都抄。劉國勳回覆《東網》查詢時就否認抄襲，他指封面拍攝位置一向是熱門影相位，標題顏色則是向設計公司要求民建聯藍，故以全身藍色示人，強調「真係咁啱得咁橋」。

劉業強睇完都覺得兩份報告好相似，例如啲角度、色水咁，但唔認為係劉國勳抄佢，反而笑笑口咁話可能係因為佢份報告做得好，所以深深咁入咗劉國勳嘅腦海入面！劉業強仲話自己都有將兩份報告放埋一齊影張相，覺得成件事都幾搞笑，事後亦都有同劉國勳溝通過，睇嚟都係一場巧合，絕對唔會影響到佢哋兩個人嘅關係咁話！