早排外國有人搭完飛機後，被床蝨咬到周身腫痛，起晒一粒粒紅點，非常恐怖！殊不知，香港首位葡萄牙籍區議員、觀塘區議員畢東尼(Anthony)早前去完英國返嚟，左腳都腫到好似豬蹄咁，又甩皮又痛，嚇到私家醫生立刻寫紙話情況緊急要入院。

Anthony去到聯合醫院急症室，就同醫生講「我好忙」唔想入院，點知醫生話「我知啊！都要入。」望真啲，原來睇症嘅係任職急症室醫生嘅九龍城區議員鄺葆賢。Anthony笑稱，當時覺得自己好少事，都唔敢同人講自己係區議員，所以同其他市民一樣等咗幾個鐘，等到飯都無得食。結果入院幾日後，仲未好番晒就趕住出院工作，醫生都唔知佢中咗咩毒。

依家佢行路拐吓、拐吓，成個區議會都知佢變咗「拖鞋議員」，因為隻腳腫到着唔到鞋。去旅行原本開開心心，點知一個唔好彩就搞到痛苦收場，真係陰功。