政Whats噏：陳細潔卸任保良局主席　難忘搵友捐錢

保良局今日(16日)換屆，啱啱卸任保良局主席嘅陳細潔(Abbie)就話好唔捨得，話晒佢由總理開始，已經服務咗保良局11年，所以不捨之情多少都有啲㗎喇！不過佢覺得做咗咁耐都好足夠，特別係佢做主席嘅呢一年，平均每日都只係瞓得4至5個鐘，公司嘅業務更加係完全冇打理，全職投入做主席，真係忙到冇停手，期間好多假期都取消咗，所以嚟緊7月會去英國放大假，好好休息吓咁話！

問到任內遇到過啲咩困難，Abbie就話籌錢係一個難題，事關好多人以為保良局已經有多年歷史，實係有好多錢，但實情保良局嘅開支都好大，每年大概要使30億港元，而就算扣除政府資助，每年都要籌錢10億，所以Abbie上任以嚟成日都要搵啲老友捐錢，仲要親自做計劃書、親自上門去解釋，咁先可以說服到人捐錢，唔怪得Abbie呢一年忙到連假都冇得放啦！