政Whats噏：未諗派人戰補選　張宇人自嘲樁腳多

立法會現時仍有兩席懸空，外界普遍預期自決派劉小麗較有可能放棄上訴，令九龍西或會出現補選，自由黨深水埗區議員李梓敬早前表明如獲建制派推舉，好樂意出選。自由黨主席張宇人今(16日)出席自由黨25周年黨慶時就話，係咪派人出戰要睇下黨友同其他黨情況，以自由黨去做地區選舉，如果大家唔配合都會好難選，仲自嘲「除咗港島，我哋九龍西就最多樁腳㗎啦，有兩件(兩個區議員)」，佢話，依家黨內未傾，建制派都未傾，所以難講係咪會派人選。

自由黨原本係「兩條腿走路」，除咗有功能界別議員外，亦有直選議員，不過上次選舉喺直選就輸咗，張宇人就聲稱自由黨唔會放棄「兩條腿走路」，但搵人選有困難，好難搵人「唔會西瓜靠大邊」喎，「當你話我唔支持標準工時、最低工資，好多人就會覺得我冇得贏地區直選」。

張宇人覺得，即使以自由黨嘅理念出戰直選仍有得贏，「好多人唔明白根本嗰啲票唔係你嘅」，好多中產、中小微企都會支持佢哋。佢話，有啲離開咗嘅黨友唔明白，「如果呢個黨嘅理念你唔支持，而你覺得係選得贏嘅，咁你唔好入黨，個黨唔會因為你去改變成個黨嘅理念」。