政Whats噏：唔係結婚　柯創盛因乜公開講我願意？

公開承諾唔係每個人都做得到㗎，立法會議員柯創盛(柯仔)都話，自己好少公開講「我願意」，對上一次已經係結婚嘞，不過，另一樣嘢佢都肯公開講「我願意」喎，就係捐贈器官嘞。睇嚟呢樣嘢對佢嚟講，同結婚一樣咁重要喎！

柯仔今日(17日)出席一個支持器官捐贈嘅活動，食物及衞生局局長陳肇始、立法會議員葛珮帆及鄭泳舜等人都有出席。柯仔話，好多年前已經簽咗器官捐贈卡，依家仲有袋喺身邊，見到張卡又黃又舊，仲有唔少污漬，都足以證明柯仔冇講大話啦。

柯仔回憶起當年說服媽媽支持佢簽捐贈卡都唔容易，佢話媽媽為人比較傳統，都會覺得人死後要留全屍，所以都要睇啱機會才能說服到媽媽支持佢，佢估計單獨傾未必掂，於是揀咗一個全家人一齊食飯嘅日子，兄弟姊妹一齊幫口說服媽媽，自己就同媽媽講，捐器官可以幫到人，結果媽媽就喺半推半就之下答應咗嘞！要說服家人，諗下方法真係得喎！