第一身片段曝光！女司機馬路舞龍　硬撼小巴

馬路炸彈？近日有女司機於大窩口連切兩線，更直撞向小巴，涉事車禍的第一身車Cam片在社交網站瘋傳，可見當時情況驚險！

片段被上載至Facebook群組「馬路的事討論區」，事發於周一（16日）中午時分，涉事車輛正沿青山公路葵涌段近大窩口體育館路段中線行駛。期間一輛黑色私家車從其左邊爬頭，兩車繼而在公路上「切來切去」。

其時，一輛從油站駛出的小巴，正於左線等候轉出馬路。涉事私家車一度連切兩線，包括越過一條雙白線後，懷疑收掣不及，直撞向小巴的司機位置。

事件於各大駕駛群組廣傳，有目擊的網民指出，涉事私家車的司機為一名女司機。不少人隨即鬧爆，「架紅Van一早出咗，仲要切雙白撞埋去」、「真係舞龍咁舞」。又有網民為一眾女司機護航，「點解每次撞車都要強調係女司機呢」。

---------------

《港呢啲》：大事小事騎呢事，東網嚴謹選題，輕鬆製作！