政Whats噏：泛民東區區會傾DQ　反被主席DQ

立法會補選都完咗成個月，4名新議員都已經投入工作，殊不知補選前嘅取消參選資格(DQ)風波餘波未了！東區區議員10名泛民議員由事件發生後，就一直狙擊取消香港眾志常委周庭參選資格嘅港島區選舉主任、東區民政事務專員鄧如欣，批評佢做法不當，而今次就喺本月4日向東區區議會提交咗名為《討論2018年立法會補選港島選舉主任取消準候選人提名資格的決定之法律問題》嘅文件，要求喺4月24日嘅會議上討論。

不過，東區區議會主席黃建彬尋晚(16日)就話按政制及內地事務局嘅回覆，基於案件進入有關司法程序，所以唔適宜討論，就ban(否決)咗班泛民議員嘅文件，結果班泛民想傾DQ，點知就被DQ！

班泛民議員當然唔滿意啦，事關周庭都未提選舉呈請或者司法覆核，何來「司法程序仍在進行中」？仲話就算真係唔適合，都應該喺會議上由政府公開交代，而唔係由區議會主席去通知。佢哋又提到兩年前嘅旺角暴亂後，都有議員提《嚴厲讉責暴力行為，要求嚴懲暴徒》嘅文件獲批，而當時已經有示威者被捕，而且喺裁判法院過堂應訊，批評區議會主席雙重標準，同政府「打龍通」咁話！