政Whats噏：研與公僕看齊　雙學議助有薪加？

立法會議員酬金及工作開支償還款額小組委員會建議增加辦事處營運開支，依家正諮詢全體議員嘅意見，希望改變依家只參考丙類消費物價指數嘅做法，當中職員開支組成部分參照公務員薪酬調整幅度。不過，依家好多議員助理嘅身份都備受爭議，好似先後被取消議員資格同參選港島區補選資格嘅香港眾志主席羅冠聰同常委周庭，會做民主派議員區諾軒嘅助理，而學聯前副秘書長岑敖暉(Lester)就係朱凱廸助理，到底呢班以前圍過政府總部嘅助理，薪酬係咪適合同公務員睇齊呢？

立法會議員酬金及工作開支償還款額小組委員會指出，2017/2018年度辦事處營運開支償還款額按年調整只有1.5%，幅度以丙類消費物價指數變動為基準，而該年度中低層公務員嘅薪酬調整幅度就係2.94%，有委員指要縮減其他辦事處開支，才能令職員人工增加高過1.5%。

委員會認為，喺辦事處營運開支償還款額中嘅職員開支組成部分，應該參照公務員薪酬調整幅度，以確保職員可獲合理薪酬，至於其他部分就應該參考丙級寫字樓租金指數及丙類消費物價指數，而按照過往3屆立法會辦事處營運開支還款額，用於職員開支就係73%。按照2015／2016年度嘅數字，以丙類消費物價指數去計算，就係調整2.5%，若以擬議嘅加權調整指數去計算，就係4.39%，相信建議若獲通過，呢部分嘅開支極有可能會增加，最受惠嘅當然係一眾議員助理嘞！

不過，唔少助理嘅身份都備受爭議，好似Lester就係朱凱廸嘅助理，而周庭同羅冠聰會係區諾軒助理，呢3位助理都係「雙學」，即係前學民思潮同學聯成員，「雙學」以往有包圍政府總部嘅往績，既然唔認同政府，又係咪應該將佢哋嘅人工去同公務員比較呢？定係利益猶關嘅時候，就覺得政府嘅制度有幾好幾好呢？唔知公務員事務局局長羅智光點睇呢？