政Whats噏：沈祖堯再行醫　畀病人當係病人

香港中文大學今日(14日)頒授榮譽院士，喺典禮上見到中大前校長沈祖堯，唔知佢冇做校長之後有乜去向呢？佢話自己去咗打工，喺威爾斯親王醫院睇症，唔知係咪因為做校長時太辛苦，成個人瘦晒，試過有病人一嚟就問佢：「校長你瘦咗好多喎，係咪唔舒服啊？」搞到佢都忍唔住反問病人：「依家你睇症定我睇症啊？」

不過，沈祖堯都話依家已經冇咁忙喇，雖然瘦咗但冇唔舒服。咦？乜近年唔係成日講醫療人手不足咩？竟然仲冇咁忙？佢解釋係同做校長嘅時候比冇咁忙，做前線嘅醫護人員都係好忙碌嘅，畢竟依家睇症同以前唔同，程序手續複雜咗，病人要求高咗，所以睇每個症都要處理多好多嘢囉！

今年其中一個獲頒授榮譽院士嘅蕭永泰都係醫生，同時係中大畢業生，喺讀書嘅時已經鍾意搞活動，畢業後更有份成立中大醫學院舊生會，佢話初初只係諗住同學之間可以保持聯絡，點知一搞就搞咗幾十年，所以逾搞逾多活動，仲試過有一次同一啲比佢年輕30幾年嘅畢業生合作，先發現原來佢哋鍾意搞好晒啲嘢之後，喺last minute（最後一刻）先至通知佢，搞到佢喺安排上有啲狼狽，但佢坦言冇怪到啲年輕人，仲形容佢哋好得意，令佢了解多咗年輕人嘅諗法。

另一名獲頒榮譽院士嘅係陳志新，佢都係中大畢業生，但畢業初期都冇乜諗住服務番中大，反而係想出嚟喺社會上磨練下，於是投身航運界，結果一做就做咗幾十年，而隔咗一段時間後，咁啱有人邀請佢捐款支持中大發展，於是又再同中大聯繫番，佢仲話依家各大學喺推廣中國文化方面較弱，希望嚟緊可以支持多啲呢方面嘅發展咁話。