政Whats噏:拍千條片 鄭泳舜話5000蚊搞掂!

20180517
東網電視
更多新聞短片
鄭泳舜申報喺補選期間拍咗1000條video,平均每日要拍17.9條!(資料圖片)
科技日新月異,網絡已經係傳播訊息嘅主要媒介,所以選舉已經唔可以單靠傳統派傳單,或者喺交通工具登廣告咁簡單,而要喺網絡上花啲功夫。就好似參加咗今年3月立法會九龍西選區補選嘅鄭泳舜,佢申報喺今年1月15日至3月11日期間,拍咗1000條video,平均每日要拍17.9條,都咪話唔誇張!
鄭泳舜喺今次選舉經費用咗約138.8萬港元,由佢所屬嘅政黨民建聯全數捐贈找數,當中大部分都係印小冊子、海報、傳單、搞造勢大會等傳統功夫,而呢1000條video只係總值5000港元,計咗喺租用3個民建聯九龍城支部嘅開支入面,實際上租用辦公室仲會用嚟管理Facebook、Whatsapp等,所以video唔需要用足5000港元,真係低成本高效益啊!
至於參加新界東補選嘅方國珊都用咗99.7萬港元,以獨立候選人嚟講呢個數字非常高,唔通佢真係用晒自己份姑婆本?不過睇真啲,方國珊雖使費高,但收到嘅捐贈都高,淨係眾籌都有45.6萬港元,加上另外個別人士捐助47.3萬港元,加埋成93萬港元,如果再向政府申索選票資助,根本就1蚊都唔洗畀,又使咩擔心用晒份姑婆本呢?