政Whats噏：袁國勇入院做手術　太太話小事

從不吃三文魚、飲食極小心嘅港大微生物系講座教授袁國勇最近病咗，仲入埋院，聽聞係入院做一個小手術，依家已經出咗院留家休養。喺屋企陪伴教授嘅袁太就冇透露丈夫咩事要做手術，但笑笑口話只係小事，「唔嚴重，唔係咩大手術嚟㗎！」袁太話丈夫休養多一陣就無事，叫大家放心。

袁國勇今年已經61歲，已屆退休之齡，除咗係香港知名傳染病專家，近排為香港學者爭取內地科研資金不遺餘力，希望跨境申領國家科研項目經費，吸引同埋挽留香港人才。佢之前發表過「不吃三文魚論」，仲建議市民食生果前，要把生果浸喺非常熱嘅水中1至2分鐘後先食，睇得出佢對健康有一份執着。