政Whats噏：陳曼琪疑棄區選　歸還議席予民記

區議會換屆選舉明年11月舉行，身兼黃大仙區議員嘅港區全國人大代表陳曼琪，政圈流傳佢將放棄連任，並將議席歸還給其原本所屬嘅民建聯(民記)。而近日地區上亦見到端倪，早前陳曼琪落區反對領展收回慈雲山中心二樓街市時，展示嘅大頭橫額一併印上一名民記社區幹事照片，交棒意味甚濃。不過，陳曼琪就話，目前會繼續努力做好區議員嘅工作。

陳曼琪上月中在Facebook個人專頁上載一幅橫額，最令人關注係橫額竟然用咗「民建聯黃大仙支部」牌頭，當時一度傳出她可能回歸民記。據悉，陳曼琪並無回頭嘅打算，反而有傳佢想將個正愛選區議席歸還民記，而接手者可能係橫額上嘅民記社區幹事。

陳曼琪在2000年加入民記，2003年擔任黃大仙正愛選區區議員至今，4次區議會選舉都掛上民記牌頭，並順利當選。2014年違法佔領行動期間，佢代表潮聯小巴就旺角佔領區申請禁制令，要求佔旺人士離開，因而聲名大噪。及至2016年初，她宣布退出民記，之後更當選新一屆港區全國人大代表，如果佢今次交番個議席出嚟，亦都符合政治倫理。

至於正愛選區，陳曼琪在2015年換屆選舉中，遭本土派組織「慈雲山建設力量」嘅麥子豪挑戰，現時麥子豪喺區內似乎唔見影，取而代之係同一組織嘅岑宇軒，佢近日已經開始喺慈愛苑現身，估計會再次參選挑戰建制派。不過，假如選舉確認書制度引入區議會選舉嘅傳聞屬實，本土派參選人到時入唔入到閘都成問題。

至於陳曼琪係咪真係放棄連任區議員，佢回覆東網查詢時話，自己係民選區議員，目前會繼續努力做好區議員的工作。佢又話自己係獨立區議員，與民記在地區上有緊密合作，所以在其海報上印有民記成員照片，至於有關橫額上嘅社區幹事，佢話只係一名義工喎。