政Whats噏：港大又冧樹　蔣麗芸寸陳淑莊失蹤

港大鄧志昂樓前兩棵細葉榕，上月被指健康差同出現傾斜，地政總署早前決定移除，引起立法會議員陳淑莊等人反對，質疑署方嘅決定。建制派立法會議員蔣麗芸（Ann）今日(10日)喺社交網站貼出「尋人啟事」，指摘陳淑莊在之後多宗冧樹事件中「潛水」。

該張啟事印有陳淑莊嘅相片，形容陳為瘦削身材，並指陳自上月現身港大石牆瀕塌大樹現場後，本月6日港大再有危樹倒塌，同月8日有其他大樹倒塌，陳氏卻一直未有現身，指「余甚掛念，連日大雨，余憂其潛水太深，恐生意外」，又指任何人士如發現其行蹤，請即告知。

翻查資料，本月6日，即上周三，港大李兆基堂對開一棵20米高細葉榕倒塌，擊中一輛停泊的校巴，車頂被「劏開」，幸車內無人，而本月8日，即上周五，喺熱帶風暴「艾雲尼」吹襲期間，多區都有大樹倒塌。

Ann接受查詢時指，港大早前被移除的細葉榕，早已有街坊投訴怕其倒塌會傷及途人，批評陳「為反而反，乜都反，連可能會危及安危都反」，又質疑佢「反得一棟，係咪棟棟都要反」，近日有啲原本未屬危險嘅樹都因風暴而倒塌，作為議員應先考慮市民的安危，關心市民較關心樹木更為重要。