政Whats噏：馮檢基轉投建制？　民協急澄清

政界近月盛傳前立法會議員馮檢基(阿基)將退出有份創立嘅民協，傳言四起之際，尋晚有聲稱係「富昌邨街坊」致電網台爆料，話有民協成員幫建制派派糉，懷疑阿基同民協都已轉投建制陣營喎！民協深夜出聲明列三點澄清，講明幫建制派派糉嘅人士已經唔係民協支持者。

民協承認街坊口中嘅「民協成員」係該黨嘅「核心支持者」，不過早排已疏遠民協團隊，最近更無聯繫，根據其近日舉措，相信該人士已轉投建制陣營。民協又話，涉事當晚無委派任何人到邨內派糉，強調有關人士近日行事，絕非民協委派。

對於網台主持聲稱阿基無正面否認，民協解畫，話係事出突然，對於阿基未掌握情況下無確切回應，造成公眾疑惑表示抱歉，重申民協絕無與建制派有任何妥協及合作。另外，阿基尋晚都有係社交網站轉載節目，仲留言「總是要無中生有」。