政Whats噏:圍插環境局 謝展寰代黃錦星受靶

20180613
東網電視
更多新聞短片
張宇人鬧爆環境局,頂更的謝展寰無奈受靶。(設計圖片)
環保係大趨勢,但唔少食肆仲附送用完即棄嘅塑膠餐具,嚴重污染環境。環境局署理局長謝展寰今日(13日)喺立法會上話計劃研究管制即棄餐具,隨即畀班議員鬧爆,當中飲食界議員張宇人(Tommy)鬧環境局係佢嘅頭號敵人,批評當局多年嚟只係「拎枝棍毆落去」,乜嘢都冇做,仲話希望政府唔好淨係做立法,要增加財政誘因,令市民減少使用即棄餐具。老實講,理應係局長黃錦星去回應議員質詢,謝展寰呢次代咗黃錦星受靶嘞!
議員陳克勤今日喺立法會提出質詢,指有5間大型連鎖快餐店喺2016年時共派發逾4億件即棄塑膠餐具,問政府會唔會鼓勵快餐店減少使用甚至停用即棄餐具。謝展寰回應話香港嘅家居廢物雖然稍為下降,但係因為工商廢物增加,所以廢物產生量仍有上升趨勢,對於附送用完即棄嘅塑膠餐具,佢就話會計劃研究管制。
聽完謝展寰咁講,克勤就同政府計數,話由今年做研究開始,到有條例草案出台,預計要大大大後年先上立法會首讀,鬧爆政府要花3、5、7年先可以立到法。佢仲舉咗唔同例子,話有食店以財政誘因去令市民減少用即棄餐具,叫政府參考。
之後Tommy就寸爆謝展寰,話「畀多個答案你(環境局)可以自圓其說」,指因為冇人洗碗同筷子,所以令到工商廢物增加。佢仲話同緊幾個大型快餐店傾緊點樣減少用即棄餐具,希望政府唔好「口爽荷包立」,唔好淨係做立法。
佢又話?住環境局好多年,環境局係佢嘅「頭號敵人」,批評當局多年嚟只係「拎枝棍毆落去」,乜嘢都冇做。佢仲希望政府唔好淨係做立法,要增加財政誘因,令市民減少使用即棄餐具。
泛民都唔執輸鬧埋一份,民主黨(白鴿黨)許智峯就話政府唔立法規管即棄餐具,就係海洋生物嘅「頭號敵人」,仲話每3隻海龜就會有1隻食到塑膠,如果政府唔再立法就係對唔住大自然。
畀班議員狂轟,謝展寰就話要推動減少即棄餐具,需要考慮好多因素,包括香港嘅具體情況。佢仲話會同餐廳業界合作,希望可就推出自願性運動方面再作進一步探討。
其實應該由局長黃錦星去立法會回應議員質詢,但黃錦星放咗假,由謝展寰頂更,點知畀班議員鬧爆,代黃錦星受靶添!