政Whats噏︰戴耀廷搞風雲計劃　譚香文批唔掂

發起違法佔領行動嘅香港大學法律學院副教授戴耀廷，喺立法會選舉發起「雷動計劃」搞到一鑊粥後，又打算喺明年區議會選舉搞「風雲計劃」。本身係黃大仙區議員嘅前立法會議員譚香文狠批風雲計劃只係靠理念同口舌之爭，明言「區議會層面單靠政治口號，根本不可能挑戰建制派的地區服務」。

戴耀廷打算喺區議會選舉憑風雲計劃，令泛民喺選舉中搶佔過半議席。譚香文喺社交網站就話，單憑理念不足實踐目標，又質疑一眾「風雲戰士」究竟有幾多地區服務經驗，定係只係靠理念或口舌之爭？

譚又以啱啱過去嘅東區佳曉選區補選，民建聯兼工聯會候選人植潔鈴打敗泛民候選人李鳳琼為例，認為就算泛民「星光熠熠」、「眾星拱月」搵啲政治明星助選，都係無助選情，因為「選民知道投了李鳳琼就只有李鳳琼，絕不會換來楊岳橋、譚文豪，梁家傑等人為您服務」。故此要贏區選，用心用力服務社區外就別無他法。

譚仲批評部分泛民對地區服務欠長遠承擔，但建制派強項就係地區服務深耕細作，亦都因為咁，民主派嘅區議會議席先會愈來愈少喎。