政Whats噏:為食林正財拒戒口 最愛茶餐廳

20180618
東網電視
更多新聞短片
林正財認為食物不分級數,因為總會搵到值得欣賞之處。(葉華英攝)

行政會議成員兼安老事務委員會主席林正財好鍾意踩單車,而且身型標準,睇嚟都幾注重運動同飲食喎。不過,佢就話唔會為戒口而錯過美食,其中茶餐廳同美式快餐店更係佢至愛添!

林正財仲話鍾意食好嘢,但佢所講嘅唔係貴價食物,因為佢覺得食物產量少就自然會貴,所以貴唔代表好食。佢仲覺得要學識欣賞食物,亦要認識食物嘅營養,咁就可以歎美食之餘又夠健康。佢仲自爆會同3個仔女,為歎一杯靚奶茶特登抽時間去南山邨嘅冬菇亭添!果然貼地。

多做運動身體好,佢話現今普遍早死嘅人係因心肺功能差,所以佢熱愛踩單車,可以加強心肺功能又唔怕傷關節。佢話平日踩單車時,附近總會有其他後生仔,可以靠對手歲數去斷判到自己心肺功能大約幾多歲,而佢現時可以追上甚至超前30歲嘅車手嘞!睇嚟佢心肺功能好好喎。