政Whats噏：睇肉團難產　陳恒鑌張宇人成箭靶　

立法會食物安全及環境衞生事務委員會早排籌備喺今年8月搞個巴西「睇肉團」，了解當地肉類處理同進出口檢疫情況，惟提出完之後得7人報名，加上各議員陸續縮沙，早已亮起紅燈，直到今日(19日)終於因為外訪人數不足3人而取消，正式變成「甩底團」。由於呢個「睇肉團」係由民建聯嘅陳恒鑌同自由黨嘅飲食界議員張宇人聯署要求嘅，但佢哋亦都先後甩底，依家「睇肉團」告吹，佢哋再度成為箭靶，被其他議員鬧爆。

陳恒鑌早前已經話因為夾唔到期所以冇報名，至於張宇人本來都話去，點知早前以年事已高，打防疫針有風險，所以唔參加睇肉團嘞！本來都冇乜大影響，事關本月初嘅時候都仲有委員會主席何俊賢(高佬賢)、委員黃碧雲(一舊雲)同譚文豪、非委員何君堯參加，勉強可以成團，但最新消息係譚文豪同何君堯都先後退出，「睇肉團」終告難產。

相信最失望嗰個應該係高佬賢，因為佢由始至終都想搞得成嘅，而一直堅持話會外訪巴西嘅一舊雲知道睇肉團告吹後，直言非常憤怒，事關佢機票買咗、針又打埋先嚟話去唔成，又好難怪佢嬲到爆嘅！佢大鬧倡議「睇肉團」嘅陳恒鑌、張宇人，話前者倡議完又唔報名，後者就因健康問題去唔到，佢又話既然去唔到，一開始就唔好倡議喇！一舊雲又話秘書處用咗好多時間精力去籌辦，最後去唔成係非常差嘅情況，覺得好離譜同好遺憾。

至於譚文豪就話一開始已表明視乎行程先決定去唔去，提出要睇成個肉類供應鏈嘅運作，例如點保持肉類溫度、運送過程情況等，結果成個行程有3日係去睇農場，而只會同當地政府官員會面，唔會同地方區會溝通，佢就覺得既然搞咗咁耐都安排唔到，索性決定退出。「睇肉團」搞唔成，譚文豪認為責任同退出嘅先後次序無關，反指倡議去巴西嘅陳恒鑌同張宇人應負多啲責任，仲話就算張宇人有健康問題，佢都可以搵黨友代表參加啫！