政Whats噏：區諾軒疑棄選區會　議席交還白鴿黨？

現時立法會68名議員中，有26人為身兼區議員嘅「雙料議員」，佔整體議員嘅38%。不過，隨住明年區議會換屆選舉，近來傳出唔少「雙料議員」要減磅，退位讓賢扶植新人頂上，估計換屆後全港區議會會有唔少新面孔。而喺今年3月補選成功進身立法會嘅民主派議員區諾軒，最近成日帶住個疑似民主黨(白鴿黨)小花喺利東邨派單張兼出埋Banner，唔通佢想將老巢利東邨一席讓番畀白鴿黨？

區諾軒係立法會內最年輕嘅議員，佢喺2010年加入白鴿黨，2011年首戰區議會後未曾嘗敗，更喺2015年獲得超過3000票成為南區「票王」，更同前黨友羅健熙喺鴨脷洲「拍住上」，合稱「利東孖寶」，加入白鴿黨7年多，佢喺舊年以路線唔同為由退黨。至今年初立法會港島區補選，佢以香港眾志周庭「Plan B」身份頂上，最後以近1萬票差距擊敗新民黨陳家珮。

新丁上任，外界仍有唔少人都將佢視為眾志「地下成員」，區諾軒就強調唔係眾志嘅「衞星議員」，他日若眾志可重新參選，下屆必定退出。之但係，依家眾志都明知自己無得選，轉型做民間政治團體，係咪意味住區諾軒可暫續立法會一席？

區諾軒今日就帶住一位年輕女子陳欣兒到佢嘅選區漁安苑派單張，同時利東邨內更有掛上印有陳欣兒、羅健熙同區諾軒嘅橫額，其中陳羅2人中間更夾住一個白鴿黨黨徽。按慣例推斷，掛得雙牌頭就梗係有人準備退，唔通區諾軒「真‧退位」？佢回覆查詢時就話，明年區議會嘅事「未決定」，但「Never say never(永不說永不)」，而陳欣兒係佢區議員助理，笑稱「可能喺附近落腳呢？」

話時話，退黨係咪要讓番個位都唔一定，就好似黃大仙區議員黃逸旭，當年退出白鴿黨後都無讓位。距離明年換屆選舉只有約1年，係咪有足夠時間令選民認識新人呢，就言之過早。區諾軒如果真係讓位，最終交唔到棒可能變成漁人得利嘞！