政Whats噏：張宇人唔怕老婆　擬動議一夫多妻制

立法會飲食界議員張宇人今日(18日)帶埋太太出席活動，但佢竟然當住太太面話，計劃喺立法會提出動議恢復一夫多妻制，希望娶多幾個老婆喎，咁大膽唔怕老婆扭耳仔咩？

張宇人話得一個老婆唔夠洗碗，要娶多幾個洗多啲，同埋可以生多幾個小朋友。不過佢都只係講笑啫，佢大讚女士係從事飲食業男士嘅幕後功臣，因為經營飲食業變化大，再加上有最低工資、遣散費等負擔，所以背後嘅屋企人壓力更大。

佢太太就話丈夫以前經常工作唔喺屋企，仔女猶如喺單親家庭長大咁，好似從來無見過爸爸，同枱食飯反而似陌生人喎。不過，佢從無因此勸丈夫離開飲食業，因為仔女都係靠蝦餃燒賣養大，更話最欣賞丈夫當年放棄理想，為家人由美國返香港接手生意添！

之後佢更大爆，丈夫因從事飲食業而鍾意賭錢，曾經試過連續3晚打通宵麻雀，連度蜜月都揀有得賭嘅地方。張宇人就自辯，話9歲未入行已經識打麻雀，而且當年等到太太瞓着先去賭啫。兩公婆公然耍花槍，真係羨煞旁人喇！