政Whats噏︰熱天着短褲跑步　羅冠聰女友驚失控

大熱天時跑步都咪話唔辛苦，何況仲要着住條長褲去跑步？香港眾志常委羅冠聰嘅女朋友袁嘉蔚(Tiffany)尋晚(26日)就同幾位辦事處嘅同事和實習生喺香港仔海濱跑步，着住黑色運動長褲嘅佢，就連實習生見到都覺得熱。Tiffany解釋話着長褲因為驚會「失控」。唔好諗錯隔離，佢係話着短褲嘅話驚腳啲肉冇嘢約束會失控，認真搞笑。

Tiffany話，平時坐喺辦事處做嘢做得耐，得閒做下運動可以舒展筋骨，為咗令到身體嘅脂肪唔好失控地周圍走，所以平日都會跑下步，佢多數都係夜跑一族。莫非佢怕日頭跑會曬黑﹖佢就話係因為日頭工作忙碌，夜晚先有時間跑啫。

近來專注地區工作嘅佢又話，自己跑步時經常都見到唔少街坊，特別係後生仔喺區內跑步，所以都開始「約跑」，希望透過組織夜跑團，吸引多啲街坊做運動，順便同街坊多啲接觸咁話。