政Whats噏︰容海恩下周五出嫁 姑爺有話兒

20180802
東網電視
更多新聞短片
容海恩(左)同袁彌昌(右)傳出婚訊。

新民黨立法會議員容海恩(Eunice)同該黨政策總裁袁彌昌日前傳出婚訊,可靠消息更指兩人係奉子成婚。消息指,Eunice將於下周五(10日)出嫁,上午會有接新娘環節,之後就喺尖沙咀一間酒店舉行婚禮,婚禮只會邀請親友出席,似係想一切從簡。

東網查閱通勝資料,下周五係農曆六月廿九,即踏入農曆七月鬼節月份前最後一日,一對新人可能想避免喺農曆七月結婚。而當日亦都宜嫁娶,早上9時至11時及中午1時至3時係吉時,而上午11時至下午1時就為凶時。如果Eunice安排喺當日早上進行接新娘環節,睇怕就要喺上午11時前出門喇。

Eunice同袁彌昌結婚後,就會同袁彌昌妹妹、人民力量前主席袁彌明(Erica)及Erica老公林雨陽成為一家人。不過,早喺兩人傳出婚訊前兩日,林就率先喺其社交網站發文,話︰「You are what you choose. 老婆、朋友有得揀。其他親戚要揀時,請好好選擇。」唔知林對Eunice呢位舅嫂,係讚定係彈呢?