政Whats噏:許智峯帶大女去沖繩影畢業相

20180807
東網電視
更多新聞短片
許智峯(右)同太太(左)帶埋長女(中)去沖繩影畢業相。(受訪者提供)
爸爸媽媽都好緊張子女成長,希望見證子女每個重要時刻,所以依家就算只係幼稚園畢業,幼稚園都會安排畢業嘅學生着晒畢業袍影相。育有一子一女嘅立法會議員許智峯(峯鴿)嘅大女今年幼稚園畢業喇,佢就帶咗大女去日本沖繩影畢業相。幼稚園畢業都咁大陣仗,唔知大學畢業會點呢?
峯鴿話其實今次係5個家庭一齊去旅行,咁啱大女畢業,順便當係大女嘅畢業旅行,所以先至帶埋件畢業袍去影相留念啫!佢大讚沖繩係個好地方,可以同時滿足佢想帶仔女親親大自然,同埋太太去「血拚」購物嘅願望。而為咗畀太太放心去購物,佢就乖乖做湊仔公,喺太太去買嘢時負責帶小朋友去當地嘅公園玩。
見識過當地嘅公園,峯鴿就大嘆香港嘅公園太安全,保護措施做得太足,覺得沖繩嘅公園多設施,滑梯成層樓咁高嘅又有,玩一次都要幾分鐘,比香港嗰啲刺激好玩好多,而當地公園亦見到唔少港爸港媽帶仔女去玩,搞到佢都想返香港跟進下公園設施問題,等香港啲公園都好玩啲咁話。