政Whats噏：容海恩出嫁半島擺酒　母讚女婿101分

立法會議員容海恩今日(10日)喺半島酒店，與新民黨政策總裁袁彌昌拉埋天窗，政圈更有傳容已懷孕，今次係雙喜臨門。

一對新人喺約下午1時現身，新娘一身純白婚紗，穿上灰色高踭鞋，手持粉紅色白色花球現身，左手無名指帶上婚戒。新郎身穿黑色燕尾服，行樓梯時更非常體貼地幫新娘子提起裙襬。

容就話今日好忙，大嘆結婚唔易，有好多程序，但否認婚禮安排倉促，稱每個人結婚都要忙於安排賓客同親戚朋友等事宜，她又話今日設宴4圍，只招待家人。袁就大讚容係「最好嘅選擇」，被問到係咪就快做爸爸，佢話有好消息就會公布，仲話佢哋都好想。

容海恩母親約中午12時20分，於擔當姊妹嘅立法會議員麥美娟陪同下，主動會見傳媒。容母大讚女婿表現有101分，但被問到容是否懷孕就話唔知道，麥亦即刻護航，笑稱：「今日係講結婚，Auntie嫁女好開心」。

麥就透露，姊妹團共有5人，其他為容嘅同學及朋友，而接新娘時就要新郎袁彌昌食「生果餐」，香蕉、提子實唔少得咁話，又要求袁邊做掌上壓邊食，不過做咗幾吓就放過新郎喇。

新民黨主席葉劉淑儀及副主席潘國山亦到場慶賀，葉太祝福一對新人早生貴子，又透露向二人送上銀行禮券，等佢哋自己揸主意點用。