激靚畫面！90後寫港產Game揚威　網民捐錢撐

20180811
  • 東網電視
    更多新聞短片
    不少網民一聽到有港產射擊遊戲面世，即強烈要求加入香港地圖。
    近日，有團隊在討論區發貼，說寫了一隻電腦射擊遊戲Raid of Regions，希望網民集氣。單看畫面，竟然直逼歐美日遊戲級數，機迷議論紛紛。
    要寫這樣一隻多人對戰第三身槍戰遊戲，製作團隊有幾人？金主又是誰？有網民甚至質疑製作團隊具有紅色資本背景。
    製作人解畫，結果出爐。Toward Games團隊，原來得三人。位位20歲出頭，每人湊了萬多元，便展開一場追夢的故事。
    三人打江山　熱血如上莊
    他們還未有自己辦公室，通常各自在家工作，方便長期作戰。睡眠不足，是家常便飯。就在訪問前一晚，他們只睡了四小時，說是為了趕起遊戲更新，再擷取畫面放到討論區宣傳。
    「係同上莊差唔多程度嘅熱血囉！」Jessie笑說。他們在城市大學主修創意媒體，負責宣傳和設計的Jessie與團隊主腦Mars畢業已一年，寫程式的Lewis則預備升大四。
    一齊寫遊戲，因為愛打機。Mars說：「我讀幼稚園小學嗰陣已經睇阿爸玩生化危機，大個咗就同家姐玩模擬市民、夢幻西餐廳嗰啲，再大個啲就玩射擊Game呀，單機Game Assassin's Creed、Witcher嗰啲」。
    Jessie興奮地插嘴：「我阿爸都係負責買Battlefield畀我嗰個嚟㗎喎，哈哈！嗰時同佢一齊行過遊戲舖，我同佢都覺得『嘩好正喎』，跟住就買咗」。
    Lewis父母不打機，但自從知道兒子進軍遊戲界，也偷偷在Google自學：「最近佢哋同我傾偈，都會話『嘩嗰啲槍Game點樣點樣㗎喎』，有次佢話『你呢度加多個Buff，粒子彈可能識着火，好玩啲』咁樣，我係完全唔知佢點樣可以知道呢啲資訊」。
    放棄手遊　興趣行先
    父母全力支持，他們放手一搏。但今時今日不做手機遊戲，似乎同錢作對？「手機遊戲個生產周期短之餘，錢係賺得多啲嘅。」Mars說：「我哋都係做我哋自己想做嘅嘢，多過諗錢…我哋想整槍Game，咁槍Game喺電腦個操控比手機版好好多，就喺電腦整囉」。
    「喺個畫質上，其實我哋用咗好多時間去學，外國Game係點做一啲Modeling（建模），一啲後製嘅Effect（特效），或者VFX（視覺效果）之類，我哋全部都花咗好多時間去研究，可能個工序唔係平時香港啲人整Game會用到」。
    奮鬥半年，是時候將心血推給機迷試試反應。他們在動漫節前不眠不休地趕工，製成一個試玩版，並在討論區發貼，圖文並茂地介紹Raid of Regions。
    「我哋幻想個Post係，可能有幾十個人睇到，畀啲正評我哋咁，就算㗎喇。但估唔到幾個鐘入面，啲正評已經爆到好高，呢樣係我哋意想唔到嘅。」
    打本土情懷　我要真香港
    網民瘋狂正評，一來畫面有驚喜，二來港人撐土炮，三來，原來很多人想玩香港地圖，「我哋一開始就想出城市場景，無奈資源上好難做到，因為整一個城市，建築物呀、入面啲家俬擺設呀係非常之多，你要花更多時間去做」。
    「大家都好想有旺角、果欄嗰一類，我哋覺得必有嘅係天橋、霓虹燈、行人隧道嗰啲，就算欄杆上面嗰啲橫額，我哋都會試整。」橫額？議員嗰啲？「哈哈，可能係啲畀人篤穿咗嘅都未定，香港特色嘛」。
    為了完成這項複雜工程，時間與金錢，缺一不可。他們在外國眾籌網搞集資，可惜出師不利，「討論區個Post最慘痛嘅經歷呢，就係出Post嘅人唔記得擺番我哋（眾籌）條Link入去…」
    Jessie大笑，Mars欲言又止：「呢件事教訓咗我嘅係…」Lewis突然搶閘：「教訓咗唔應該畀我開Post！」語畢趴在桌上，笑到失控。如今集資進度不似預期，有無鬧交？Jessie說：「冇呀，笑囉，恥笑自己囉！」
    衝出香港　700人註冊試玩
    無論如何，他們力爭在今年年底將Raid of Regions放到遊戲商城上架，定價156港元。扣除中介收取的三成佣金，收入其實還不夠為三人出糧，不過他們目光不止於此。
    「我哋都唔敢奢望有好多人玩呢隻Game，畀大家認識到我哋已經係好好喇。其實同時在線人數大槪有幾百或者一千個，已經好滿足㗎喇，作為第一隻作品嚟講」。
    「隻Game會出多國語言版本，其實我哋六月份已經將宣傳片發畀各大媒體，外國同香港都有，外國媒體都有報道過我哋有Closed Alpha（封測），當時反應都OK，有六、七百個外國玩家註冊」。
    半年零收入　年輕是本錢
    為了夢想，Mars和Jessie畢業後放棄全職工作，只靠兼職幫補，月入幾千，公司成立至今零收入。對他們來說，年輕就是本錢。
    Mars說：「我份兼職有時會轉介我去做其他嘢，待遇都幾優厚，但呢樣嘢始終吸引唔到我嘅原因，係如果我一旦返全職，個心穩定咗，我就唔會再敢、亦都唔會有一個契機，令我自己走出嗰個咁穩定嘅環境，所以我寧願困難重重咁去嘗試」。
    「咁當然你可能會話，不如返一年全職，之後先去做（創業）啦，我覺得未嘗不可嘅。但時間有限，嗰一年可能最終係嘥咗都未定。或者賺咗嗰一年嘅錢，其實係儲唔到嘅，可能你去旅行或者買其他嘢使咗。咁其實如果都係會咁，不如就由諗到嗰一刻開始做啦！」
    ---------------
    《港呢啲》：大事小事騎呢事，東網嚴謹選題，輕鬆製作！