政Whats噏：林鄭直播吸嬲五千　避同志問題捱轟

行政長官林鄭月娥尋晚(17日)喺社交平台Facebook搞直播，至今(18日)午狂吸5000幾個「嬲嬲」，呃Like失敗之餘，仲被多個同志團體聯署炮轟避答問題，指「性傾向」喺直播期間出現頻率第二高，但係林鄭竟然視而不見，一次都無答過。

團體話統計48分鐘直播期間網民嘅提問，指「單程證/証」一詞出現572次佔最多，其次就係出現399次嘅「性傾向」，而隨後嘅「房屋」同「土地」都已經唔多過250次。團體不滿林鄭竟然抽中同回答出現得一次嘅「學生壓力」、「選修科」同「green finance(綠色金融)」，但「性傾向」就無一被選中，認為直播中嘅主持迴避有關問題，批評林鄭對同志社群視而不見，令人質疑啲問題係咪預先夾好。