政Whats噏：蛇齋餅糉再升級？多名建制區議員派現金

建制派經常被外界批評用「蛇齋餅稯」去討好市民，爭取選民支持，近日更疑似出現「升級版」。觀塘區多名建制派區議員同地區人士都同觀塘民聯會(觀民會)合作，為選區內嘅中、小學生提供300蚊港紙嘅現金開學津貼，未知今次「派錢」同下年嘅區議會換屆選舉係咪有關係呢？

民建聯(民記)觀塘區議員歐陽均諾今個星期一(20日)喺Facebook貼出海報，話有「學生開學津貼」，凡居於佢啟業選區嘅18/19年度在學中、小學生都可以申請，中籤者可獲發300蚊現金。海報上印有歐陽均諾嘅辦事處地址同電話，以及觀塘民聯會嘅地址同電話，但就未見列明主辦同協辦嘅字眼。另外，選舉管理委員會建議嘅新增選區安泰邨，有名為「安泰居民會」嘅組織亦喺網上列出今次津貼計劃，但海報就列明是由觀民會主辦，同時印埋居民會總幹事林瑋嘅大頭。

咁樣「派錢」唔通係為下年區選造勢？歐陽均諾回覆東網查詢時耍手擰頭，話只係負責協助街坊填表，啲資助(錢)係由觀民會負責發放，又話自己係首次同觀民會合作，街坊對津貼反應熱烈，但佢亦承認利用區議員身份宣傳係有欠考慮。

我哋聯絡到觀民會理事長、獨立觀塘區議員陳華裕，佢話開學津貼計劃涉款大約35萬蚊，其中30萬係津貼之用，其餘係租用場地等費用，預料區內1000名學童受惠。至於津貼筆錢點嚟呢？佢話係由「街坊善長」捐贈，但就唔肯透露對方姓名，又話諗過派書券，「始終現金彈性多啲嘛」。佢承認有份參與宣傳津貼計劃，否認係派錢籠絡選民。點解津貼計劃淨係同建制派地區人士合作呢？佢解釋係由觀民會嘅分區幹事會去搵相熟議員合作，不過同咗幾多位議員合作就話唔清楚喎。

至於擔任觀民會永遠會長嘅民記立法會前議員陳鑑林回覆東網時亦話，唔擔心津貼計劃會被外界質疑係「派錢」，又指所有社區服務都需要成本，「啲成本咪又係錢」，強調觀民會只係義工團體。

「蛇齋餅粽」已被人投訴多年，既然臨近區議會選舉，作為區議員或者地區人士絕對需要敏感啲，唔好瓜田季下啦！