政Whats噏：友愛邨「山墳」劣評　政府知衰拆墳

運輸署豪花20萬港元喺屯門友愛邨外，以岩石鋪砌幾座如同「山墳」嘅半球體去阻截聚賭，結果劣評如潮惹嚟地區人士炮轟。有關部門事後「知衰」，屯門區議員葉文斌今晚(30日)發現當局已經極速「拆墳」，改為放置花盆。

友愛邨近翠寧花園皇珠路入口，原本位於花槽及輕鐵路軌間嘅兩座建造中的石造「山墳」已被拆毀，一塊塊岩石擺放在花槽旁邊，而「山墳」原本嘅部分空間，則擺放咗三個巨型花盆。

運輸署聲稱「山墳」係由岩石鋪砌嘅小丘園境，用嚟阻止涉事地點非法聚賭情況，而工程由8月上旬展開。相信今次「拆墳」係政府「知衰」，所以急急腳補鑊嘞。