政Whats噏:轟政府亂派錢 陳沛然同袁國勇夾擊波叔

20180901
東網電視
更多新聞短片
陳沛然與袁國勇一齊寫建議書,要求政府善用盈餘。(設計圖片)

政府財政預算案年年估錯數,財政司司長陳茂波(波叔)更加係歷任財爺中嘅「估錯數之王」。今年初政府發表財政預算案,政府庫房又嚴重「水浸」,原本無意派錢嘅「守財奴」波叔最終轉軚向部分人派錢補鑊,但就派到亂晒龍,被各界鬧爆。醫學界立法會議員陳沛然就聯同香港大學醫學院微生物學系講座教授袁國勇一齊寫咗份建議書夾擊波叔,要求政府善用盈餘,用400億元成立四個醫療基金,好過將啲公帑亂咁揈。

陳沛然今(1日)喺電台話,過去經濟逆轉時,醫院管理局曾以「炒人」同「肥雞餐」等方式減人手,又關閉護士學校,對公營醫療人手嘅影響延續至今,認為政府應該成立基金,積穀防飢,等喺經濟不景時,都唔使削減公共醫療開支。故此佢和袁國勇共同建議成立四個合共400億元嘅醫療基金,包括「公共醫療撥款穩定基金」、「不常見疾病支援基金」、「醫療應急基金」及「尖端醫療科技基金」。

陳又話,佢哋建議應該趁政府庫房有盈餘時成立基金,反正現時有咁多盈餘,波叔都係時候要做嘢,而撥款成立基金都係為社會同市民未雨綢繆,好過之前派錢都搞到畀人鬧吖。

至於點解佢會同袁國勇一齊倡議?佢話同袁曾經喺瑪麗醫院共事,但唔算好熟絡。袁早前撰文建議政府撥款500億元畀醫管局成立種子基金,以令醫管局喺經常性開支增加時,都可以保持到服務水平。佢睇到袁嘅理念同自己相似,就親自上門搵他一齊商討,最後一齊提出建議,希望可以造成協同效應咁話。

早前政府就施政報告進行諮詢,陳沛然都有趁機會反映意見,當時波叔都在場,佢話政府一換屆就「一朝天子一朝臣」,政策亦跟住變,以房屋政策為例,當年嘅「八萬五」到「港人港地」,再到「綠置居」,政策已經唔同晒,成立醫療基金,都係希望透過恒常化,喺制度上做得好啲喎。

不過,莫講話陳沛然同袁國勇共同倡議成立醫療基金,希望就醫療問題對症下藥,外界都有林林總總成立各式各樣基金嘅建議,可惜政府出名亂使冤枉錢,正所謂「善財難捨、冤枉甘心」,叫政府大拿拿使幾百億成立醫療基金睇怕難過登天!