政Whats噏：高鐵通車儀式　泛民請政府食檸檬

廣深港高速鐵路將於今個月通車，政府會係正式通車前一日搞通車儀式，陸續有泛民議員收到邀請，但佢哋就決定請政府食檸檬，表明唔會應邀出席囉。

目前至少有8名泛民獲邀，例如有立法會交通事務委員會副主席林卓廷、司法及法律事務委員會副主席郭榮鏗，和資訊科技及廣播事務委員會主席莫乃光等。

林卓廷認為高鐵一地兩檢安排衝擊香港自治同法治，所以唔會去，其黨友、涂謹申同埋胡志偉同樣獲邀，但二人當日不在港未能出席，所以民主黨唔會有人出席。至於莫乃光喺儀式當日都有私事而唔會參加。

公民黨就有楊岳橋等4名議員收到運房局邀請，惟獨議員郭家麒例外，故該黨批評政府選擇性邀請，對個別政黨欠缺尊重，加上一地兩檢違反《基本法》同一國兩制，而且高鐵管理不善又有超支等問題，故決定一致不出席喎。