政Whats噏：久未露面　俞宗怡一頭白髮現身

人稱「D姐」嘅公務員事務局前局長俞宗怡，自2012年中離開官場後鮮有露面，上次公開現身已經係3年前，參觀當年房協首個供60歲或以上香港居民租住嘅非資助富貴長者屋。

昨日(13日)，我哋就撞到俞宗怡於一個雲集現任同前任高官嘅活動現身。現場所見，俞宗怡一身黑色裝扮，上衣嘅紫紅色花卉圖案十分搶眼，而佢過去招牌嘅黑色短髮就變咗一頭白髮，唔知同無需要再面對鏡頭有冇關呢？