山竹襲港：999忙到嘔　跌窗女子抗風扶住報警冇人聽

「山竹」吹襲下，塌樹、塌棚、飛窗、爆玻璃樣樣齊，市民求警協助需求大。警方下午發稿指，九九九緊急服務中心現時已開放所有熱線，惟電話線路非常繁忙，中心人員會盡快接聽來電，而市民有需要時，亦可致電就近警署熱線。

WhatsApp群組中流傳一段懷疑受「山竹」影響的脫窗意外短片。拍片者呼叫求助，聲稱片中位置是太子道維景雅軒一單位。片段所見，單位內客廳位置其中一扇窗正搖搖欲墜，一名女子伸手出窗外，邊對抗強風，邊出盡力抓緊脫下的窗，場面令人「睇見都驚」。拍片者大呻：「哎呀！求救求救呀！......打999冇人接呀(接聽)！我屋企個窗冧咗落嚟呀！」