政Whats噏：報錯西九站爆玻璃　鄭松泰道歉

「山竹」襲港造成巨大破壞，立法會議員鄭松泰尋日(18日)喺Facebook貼圖同貼文，指收到市民報料話高鐵西九龍站「天空走廊」爆玻璃，但原來可能係因倒影造成錯覺，佢今日(19日)喺Facebook貼出澄清啟示，為報錯料認錯兼道歉。

佢喺fb話，尋日佢嘅辦事處收到市民報料，指西九龍站天空走廊喺山竹吹襲下爆玻璃窗，辦事處確認照片係喺星期一(即山竹過後翌日)拍攝後，公開發布照片並要求港鐵同政府回應。事後港鐵回應傳媒查詢，指「沒有爆玻璃，完好無缺」。

辦事處今日派員實地了解，由於只能遠距離觀察，但確實玻璃窗冇爆破。報料市民亦再去同一位置拍攝，相片嘅倒影略有不同，估計係因為倒影造成嘅錯覺，就此，佢嘅辦事處特地澄清，並就造成資訊混亂同有關爭議致歉。

雖然鄭松泰就事件致歉，但係有港鐵中人批評，鄭作為立法會議員，不可以生安白造，尤其有港鐵高層於10號風球期間在場監察，西九龍站絕無爆玻璃。