政Whats噏：田北辰開記招遺留電話　險洩私隱

新一份施政報告公布後，議員都會輪流開記者會回應，但時間非常有限，每節只得20分鐘，不過議員田北辰無黨無派，可以一人獨霸20分鐘，唔知係咪講得太興奮，疑似電話都留低埋喇！

田北辰舉行記者會時，記者室內突然傳出音樂聲，連立法會秘書處職員聽到都神色緊張，四處張望尋找聲音來源，以免影響記者會進度，但田就繼續大講填海、取消強積金對沖等。

不過，田並非完全察覺唔到，期間兩次露出錯愕表情，但要響成50秒先發現到自己電話響囉。佢即刻道歉並由褸袋拎出電話，仲放喺枱面嘅遠處添！就可能因為放得太遠關係，搞到走時遺留咗電話。

而接住落嚟開記者會嘅幾位議員，離開時喺訪問位置嘅地上發現有部電話，莫乃光就大問係咪田北辰嘅電話，邵家臻聽到就搭句話「早知我睇下先喇」，好彩田北辰助理趕得切攞番電話啫！