政Whats噏︰恒指大瀉 張華峰答問會睇股票

20181011
東網電視
更多新聞短片
肥老闆好關心個市,佢喺答問大會提問之餘,都仲可以不時用手機睇股票。(何量鈞攝)

環球股票大跌,恒生指數今日(11日)一度瀉逾千點。雖然立法會今日舉行答問大會,畀立法會議員就政府尋日(10日)發表嘅施政報告提出質詢,但作為業界代表嘅金融服務界立法會議員張華峰(肥老闆)就好關心個市,事關佢喺答問大會提問之餘,都仲可以不時用手機睇股票。睇嚟一心二用對肥老闆嚟講,都係濕濕碎等閒事喇。

立法會每逢舉行答問大會,都有議員不敵冗長沉悶嘅會議內容,要玩下手機。 肥老闆今日都不時睇手機,但係佢就係唔係打機或睇社交網站,而係睇股票。個市大瀉,又難怪佢咁關心嘅。而飲食界立法會議員張宇人就同過往一樣,喺會上都有用手機玩接龍。佢對接龍遊戲都真係幾「專一」。 至於工聯會幾位議員包括麥美娟、陸頌雄、郭偉強亦都成日低頭睇電話,睇電話時間分分鐘多過抬起頭,唔知佢哋答問大會後會唔會頸痛呢?

有人忙於睇電話,亦都有人恰眼瞓。政制及內地事務局副局長陳帥夫唔知係咪唔夠瞓,喺會上都合埋眼好一段時間,之後擘大眼冇耐,又再合埋眼幾分鐘,不斷重複。而佢閉目養神嘅時候,亦都不時搖下個頭,係恰着咗定係做緊頸部運動就佢自己先知喇。而疑似閉目養神嘅仲有進出口界立法會議員「象哥」黃定光。象哥身體向後挨住張櫈,用左手掩住雙眼,一副「冇眼睇」嘅樣,分分鐘可以成為網民改圖嘅「潛力圖」。

正所謂遲到就好過冇到,呢樣嘢就好明顯喺醫學界立法會議員陳沛然身上反映到。事關佢喺會議完結前20分鐘先至匆匆行入會議廳,其附近議員都望咗兩眼。佢一坐低就拎起議員座位杯水嚟飲,飲完一啖又一啖,似乎好口渴。坐咗唔夠15分鐘,佢就離開會議廳喇,其實爭幾分鐘都完會,都唔爭在坐到尾,如果只係想飲水,立法會大樓好多地方都有水飲嘅。