每日一片：爆笑碰瓷黨？單車漢自製翻車　遇救護即彈起

「碰瓷黨」以假撞車、真屈錢手法近年已由內地殺入香港，在街頭對可疑人物，絕對要打醒十二分精神。近日有網民就拍得一名疑似「碰瓷黨」男子在馬路踩單車期間，突然以超誇張動作「翻車」仆倒，但當發現前來慰問的竟是兩名救護員時，其反應卻令網民爆笑。

現場是大埔運頭街，據車Cam顯示時間事發於上月13日下午約5時半。片段開始，兩名救護員剛好從救護車落車，拖着擔架床橫過馬路，未幾一名阿伯踩單車駛至，期間在無任何碰撞情況下，突然在路中央以大空翻姿勢跌倒，再大字形攤在地上，其誇張動作終於惹起路邊兩名救護員注意，上前了解，此時阿伯可能未想到出現的竟是救護員，而非隨後車輛司機，驚訝得即時彈起，匆匆踩着單車離開。

正當以為事件告一段落，踩着單車的阿伯竟又在一個路口位停車，擺出一副「博撞」姿勢，幸隨後車輛一直慢駛並與對方保持一定距離，最終更扭軚駛走。

網民直指單車男行徑可疑兼「戲屎」， 「啲戲真係唔合格！」、「臨時演員都係演員，專業啲啦」、「係咪拍緊笑笑小電影」、「好戲劇化，咁啱又有救護員」。