政Whats噏：未適應電子錢包　陳百里只用八達通

為咗方便市民過數，金管局上月推出「轉數快」系統，但有騙徒借系統漏洞行騙。商務及經濟發展局副局長陳百里今午(27日)喺金鐘一間快餐店，用自助點餐系統買午餐後，只用八達通付款，無揀到其他電子錢包，唔通佢都唔敢用？

佢企喺點餐機前一段時間，左揀右揀，終於揀到餐廳最新推出嘅包餐，付款時毫不猶豫揀咗八達通支付。事後問到有無登記選用「轉數快」、支付寶或微信銀包等主流電子錢包，佢就笑笑口話，未全面去用，話要慢慢適應，但承認電子支付比較方便，現時主要用八達通。

佢又話，今早去完一個美食節活動，唔少攤檔都接收電子支付，認為可以幫到零售業嘅生意，仲介紹當局有啲撥款係幫啲公司更新設備，以使用電子支付。

雖然「轉數快」唔係商經局產物，但作為推動經濟發展嘅政策局，局方又鼓勵企業用電子支付，副局長竟然都唔係經常用，咁邊夠牙力說服人轉用電子支付呢？