政Whats噏：田北辰苦練頂南瓜　博小朋友一笑

過幾日就係萬聖節，每年都有唔少人為咗應節，着到成身奇裝異服咁出街引人注目。立法會議員田北辰(田二少)就喺社交網站貼相，相中嘅佢着住件南瓜衫，頭上頂住個南瓜道具，佢仲問大家︰「如何頂住南瓜影相而不失霸氣」添！

田二少話，頂南瓜呢招少啲平衡力同專注力都唔掂，就連佢自己都苦練咗成朝，吸引唔少大、小朋友挑戰一番。其實佢搞盡腦汁，特登加插頂南瓜呢個特備表演環節，睇嚟都係想博大家一笑，等大家齊齊開心吓。