政Whats噏：增侍產假法案　商界議員閃走唔投票

立法會周四(25日)通過將男士法定侍產假由原本3天至5天，雖然票數最終是大比數通過，但仔細睇睇投票紀錄，8名不在席冇投票嘅議員之中，有5人屬於商界，其中商界(第一)林健鋒(Jeffrey)、保險界陳健波(波哥)同金融服務界張華峰(肥老闆)當日就所有修正案投票後，輪到政府嘅主體法案時就「咁啱」行開咗，齊齊唔使投票表態。莫非呢班商界議員驚支持增加侍產假會得罪業界，寧願一走了之都唔肯表態？

政府增加法定侍產假嘅爭議，主要集中喺增加至5天抑或7天，但焦點以外，商界議員嘅舉動都值得留意。翻查立法會網頁紀錄，當日就侍產假一共有3個修正案，其中Jeffrey、波哥同肥老闆都一齊支持政府嘅修正案，反對民主派嘅修訂，但喺1個鐘之後就主體法案投票時，3人就不約而同「失蹤」冇投票。至於地產及建造界石禮謙同工業界(第二)吳永嘉(Jimmy)更由修正案投票階段已經「失蹤」。

從另一個角度睇，香港傳統四大商會喺立法會都各有代表議員，其中身兼行政會議成員、代表總商會嘅Jeffrey，以及代表中華廠商聯合會嘅Jimmy缺席今次投票，至於工業總會嘅工業界(第一)梁君彥擔任立法會主席而毋須投票表態，只有同樣身兼行會、代表中華總商會嘅商界(第二)廖長江坐定喺位投贊成票。

議員投票時玩「失蹤」嘅情況並唔罕見，目的通常係避開就敏感議題留低投票紀錄，以免日後被選民或選舉對手抽秤攻擊。而今次5個商界議員咁樣閃咗去，唔通佢哋驚支持增加侍產假會得失所屬界別？波哥接受查詢時否認係專登閃走，佢話投完修正案之後，佢問過建制派盟友知道「數夠票」，所以先提前離開，重申佢同保險業界都支持侍產假增加到5天，「老公唔會貪多兩日假就去做人嘛」。至於Jimmy就話當日一早已經飛咗上北京開會，所以先投唔到票，同樣話支持現行方案。

不過，無論口講幾支持都好，呢5名商界議員喺立法會白紙黑字嘅紀錄上，對侍產假增加到5天嘅取態，只係喺自己名字旁邊留下一個空格；又或者將來議會可能進化到唔使投票，口講支持或反對就當作實喇。