陳淑莊毛孟靜支持度跌　被建制派爬頭

立法會雖然每4年換屆，但各個民調都反映市民對立法會議員嘅支持度，或多或少預視到各直選議員依家嘅民望。有調查發現，5個地方選區中，有4區嘅榜首都易手，其中港島區由新民黨葉劉淑儀取代公民黨陳淑莊成為榜首，而九龍西區則由經民聯梁美芬超越啱啱成為民主派會議召集人嘅議會陣線毛孟靜。唔知係咪陳淑莊同毛孟靜過往因為乜都反對，搞到支持度開始下降呢？

香港研究協會喺本月4日至23日訪問咗1100多名市民，就直選立法會議員及「超級區議會」立法會議員嘅表現評分，以1分為最低分，5分為最高分，港島區方面，葉劉淑儀以2.73分取代2.55分嘅陳淑莊，成為最高分；至於九龍西區方面，梁美芬就有2.47分，高過2.45分嘅毛孟靜，變成榜首。

其實毛孟靜由出任民主派會議召集人起，已經備受質疑，一直有指佢人緣欠佳，難以勝任有關工作，一度盛傳會被人架空，加上佢搞「香港本土」，令到佢嘅支持度下跌，選民改為支持其他議員。至於陳淑莊則相信係官司纏身，可能影響形象，加上二人喺開會嘅時候，成日都反對呢樣，反對嗰樣，時至今日，民望就被建制派爬頭喇！