政Whats噏：餵雀無王管　周浩鼎話立會都無符

餵飼野生雀鳥嘅出發點可能係好，但野雀衍生而嚟嘅衞生問題就不容忽視，小則被雀屎整污糟地方，嚴重嘅仲可能傳播疾病。立法會議員周浩鼎(Holden)近日收到市民投訴，發現原來私人地方餵野雀係無法例可管，假如有人喺立法會餵野雀，其實係無法例可規管。

Holden指現時任何人士餵飼野鴿等野生雀鳥而整污糟公眾地方，會有食環署人員執法，被檢控嘅會被定額罰款1500港元。但係私人嘅公開地方，好似屋苑啲平台呀、公園呀咁，就算有人餵野雀，其實係無法例規管，「執法人員唔去理，法例又無賦權業主去阻止呢啲行為」，佢話屋苑保安無法例可循，如果餵雀嘅人堅持唔走亦無可奈何。

立法會都屬於私人地方，Holden亦話如果有人堅持喺立法會嘅公開地方餵野雀，都唔算觸犯法例，如果政府繼續唔理，任由呢啲情況發生，笑言以後返立法會開會最頭痛可能係避雀屎！