政Whats噏：工務小組拉布重災　運房局最受影響

立法會財務委員會轄下嘅工務小組委員會，向來都係拉布重災區，會議進度緩慢，搞到工程計劃遲遲未能交畀財務委員會審議，拎唔到撥款自然就唔可以動工。政府今日(5日)交出上個立法年度嘅年終報告，有14個計劃未能如期審議，當中運輸及房屋局最受影響，一共有5個計劃原地踏步整整1年！

政府每年都會向工務小組提供年度預報，列出打算喺該立法年度提交畀工務小組審議嘅基本工程計劃。政府上年預計會提出92個計劃，但年終報告就反映出實際提請工務小組審議嘅計劃有落差，只係審議咗78個計劃，即仲有14個計劃未處理。不過工務小組上年亦都審議咗5個無列出嘅項目，所以上個立法年度一共完成審議咗83個計劃。

睇返政府列出嘅92個計劃，有3個已完成審議嘅項目仲未交畀財委會討論，分別係重置香港郵政總局、搬遷沙田污水廠至岩洞，以及涉及17億港元連接朗屏站嘅元朗天價天橋，不過前兩者已經喺今個立法年度嘅財委會上獲得通過，後者則被政府無限期押後。

至於14個未能處理嘅項目，運房局就中咗5個，分別有元朗橫洲公屋發展嘅工地平整同基礎設施工程、寶馬山行人通道系統、港珠澳大橋主橋撥款資助，以及兩項沙中線建造工程，原因都係需要更多時間完成有關準備工作。近期沙中線醜聞鬧到滿城風雨，暫緩交上立法會審議，或者可以令到運房局局長陳帆少啲受靶機會，實行以時間去換取空間喇。

教育局局長楊潤雄都好唔到去邊，事關教育局有4個計劃未趕及喺上年處理，不過有關民生書院興建一座禮堂嘅計劃，已經列咗喺今個星期嘅工務小組議程之中，可以算係見到曙光。佔咗兩個計劃嘅發展局亦有喺新立法年度追趕進度，事關當中嘅啟德發展計劃已經喺上月尾完成審議，但另一個有關欣澳填海規劃及工程研究嘅計劃，就以有公眾參與活動進行，而喺上個會期無提交計劃嘅打算喎。

新一個立法年度已經開展近1個月，但綜觀呢幾次會議都係追返上年落後嘅進度，唔知會唔會造成惡性循環，令到工程計劃愈積愈多，明年唔知又輪到邊個局身受其害呢？