政Whats噏：深水埗區會傾反明日大嶼　警鐘誤鳴下否決

明日大嶼填海計劃備受各界爭議，外界憂慮造價過高。深水埗區議會多名泛民議員提出「明日大嶼」計劃勞民傷財，堅決反對政府「盲填海」議案，今日(6日)審議議程時，開始咗冇幾耐就消防鐘聲大響，似為明日大嶼響起警號，然而泛民審議時唔齊人，衞煥南同吳美失蹤，區議會主席張永森同深水埗民政事務專員李國雄就咬耳仔懷疑「打龍通」，完全無意叫停會議，繼續扮懵審議，疑似趁唔齊人就決定投票，最終議案喺「警號」下，正正以2票之差遭否決。

多名泛民議員認為，明日大嶼填海計劃耗資高昂，一旦開始，政府財政即長期受影響，未來無法應對沙士等突如其來情況，大批市民強烈反對，認為應有其他土地供應選項。建制議員就認為，香港缺乏土地房屋供應，若不盡快增加，難以面對住在劏房的居民。

會議時消防鐘聲突然大響，當時首名議員尚未完成發言，但張永森其後繼續交代發展局未能派人出席會議，並指示下一位議員發言，佢又同李國雄多次咬耳仔，似係交換意見，又向區議會職員了解點解警鐘會響，完全無意暫停會議，會上亦冇議員要求暫停。警鐘曾一度停頓，但好快又再響起，其時泛民一直唔齊人，獨立嘅甄啟榮發言表明反對，更指過往嘅施政報告講到天花龍鳳，但貨不對辦，之後冇人再要求發言，張永森乘機喺鐘聲大響下指示投票，咁大爭議嘅議案傾咗唔夠半小時，最終以10票贊成，11票反對，否決有關議案，正正欠缺衞煥南同吳美2票。

據知，今次消防鐘響係誤鳴，期間升降機暫停，只可行樓梯。有泛民坦言，今次投票較預期早最少一小時，期間已多次催促不在場嘅議員返嚟。會後問張永森，點解鐘聲大響都唔暫停會議，他竟然話聽唔到，可能耳仔唔好。嘩，真係呃細路都唔信啦，聽唔到消防鐘又會聽到議員講嘢？睇嚟張永森聽唔到嘅並非消防鐘聲，而係廣大市民反對明日大嶼嘅怒吼啦！