政Whats噏：議員研究課題　對準陳帆楊偉雄

世界經濟論壇上月中公布2018年度《全球競爭力報告》，香港排名第七，再次輸畀排名第二嘅競爭對手新加坡，當時報告點出香港喺創新能力方面稍遜，多黨派嘅立法會議員不約而同把矛頭指向創新及科技局局長楊偉雄，並急謀對策，紛紛要求立法會有關方面研究全球領先地區就人工智能發展藍圖配套規劃，以及有關新加坡及南韓吸引創科及智慧城市做法，至於議員另一個目標人物就係頻頻要就大型基建甩漏「補鑊」嘅運輸及房屋局局長陳帆。話時話，多名議員嘅研究課題對準楊偉雄、陳帆等高官，睇怕佢哋都有得震無得瞓嘞！

據報立法會資訊服務部資料研究組喺新研究計劃下，本立法年度會期會按議員建議進行30項研究工作，而由於接獲申請多於30項研究工作，所以有關方面早前進行抽籤，結果顯示，議員關注嘅議題廣泛，當中楊偉雄、陳帆、環境局局長黃錦星等問責高官負責嘅政策範疇，都係議員重點「招呼」嘅內容。

其中針對楊偉雄領軍嘅創科範疇，建制派「班長」兼商界議員廖長江要求研究全球領先地區就人工智能發展藍圖配套規劃，並由此探索香港發展人工智能路向嘅專題研究，至於公民黨楊岳橋則提出，就新加坡及南韓吸引創科及智慧城市等方面，進行搜研工作。

陳帆主責嘅房屋同交通範疇工作，亦進入議員嘅「射程範圍」，其中來自建制派陣營嘅民建聯陳克勤，提出就港府正研究引入嘅「擠塞徵費」理念進行資料搜研工作，泛民議員譚文豪則要求，參考瑞典斯德哥爾摩及澳洲墨爾本地鐵開放動物乘搭經驗，探討喺香港推行「動物車廂」嘅可行性專題研究。

另外值得一提嘅係，旅遊界議員姚思榮同漁農界議員何俊賢係少有議員從所屬界別關注點出發，前者希望就推動持續發展生態旅遊政策進行搜研工作，後者則提出就選定地方嘅漁農業天災保障及行業補貼作專題研究。

一句到尾，議員提出嘅研究課題，大部分都同政府唔肯做，或現行做得唔好嘅政策有關，因此想透過參考外國經驗或搜集資料，加以鞭策一批唔踢唔郁嘅高官，睇怕一眾高官都係時候的起心肝做吓功課，並諗出自圓其說嘅官方口徑，免得到時研究出爐之時，被議員問到口啞啞或批評至體無完膚。