政Whats噏:高佬賢投訴垃圾高過佢 又關陳恒鑌事?

2018年11月08日 13:43
東網電視
更多新聞短片
何俊賢批評政府制度僵化,令垃圾堆積。(溫國佳攝)

漁農界立法會議員何俊賢(高佬賢)有1米9咁高,行出街都高人成個頭,點知佢今日(8日)喺立法會度講起,佢住個條村啲垃圾堆到仲高過佢,搞到佢成日向當區立法會議員兼黨友陳恒鑌投訴。嘩,咁啲垃圾咪即係有兩米高?

高佬賢話,每日7、8點,就會有架車夾走啲垃圾,包括好多非法棄置嘅傢俬及建築廢料,夾垃圾時仲會壓爛塊地,搞到路政署要封路整路,當中嘅原因就係因為垃圾站嘅設計同系統唔好,政府應針對解決。

佢批評,現時外判合約只係叫定時定候收幾多次垃圾,係制度僵化,搞到垃圾站附近有蛇蟲鼠蟻外,仲成為野狗野豬開餐勝地。而食環署用咗69萬港元,買24個太陽能垃圾壓縮箱擺喺鄉郊地區,點知呢啲箱又壞又少人用,佢話呢啲所謂嘅高新科技唔係好高新,技術含量只係自動感應同太陽能,自己10歲時已見過,香港市民期待能解決更大社會問題嘅方式,例如以新科技知道鄉郊垃圾站幾時滿,就早啲分派人手去收,令垃圾唔使留過夜。