政Whats噏：鄧家彪帶新女示威　個個怕醜

近年有唔少年輕人願意走入社區做服務，連前立法會議員鄧家彪(Bill)今日(9日)去示威都帶埋幾名後生女見人，但佢哋似乎怕怕醜醜未習慣。

阿Bill帶同多名服務將軍澳嘅社區幹事到政府總部外請願，話擔心領展進一步出售物業會推高物價，尤其政府有計劃喺將軍澳起新街市，建議政府回購領展所出售嘅區內物業，再改建為公營街市更慳時間。

不過幾位新人就怕怕醜醜，尤其阿Bill叫佢哋發言都無人敢接支咪，最後阿Bill就用頗為嚴厲嘅語氣點名社區幹事黃遠康，再叫佢哋唔好扭擰，睇嚟都係男仔比較大膽喇，而佢講得有紋有路，力數將軍澳買餸難、價錢貴、選擇少，街市物價較其他區貴廿蚊一餐咁話。

雖然阿Bill有啲勞氣，但佢話經驗要累積，後生肯花時間落區已經好難得，尤其現時社會搵工唔難，要有抱負先願意做。而三位女性都係剛畢業，非常年輕，睇嚟阿Bill要過多幾招畀佢哋先得喇。