政Whats噏：倡局長享全薪產假　何啟明幫誰爭取？

立法會呢幾日辯論施政報告致謝議案，勞工界議員何啟明尋日(8日)發言時提到，假如有女局長喺在任期間懷孕，放產假期間政府會唔會畀足30多萬月薪人工，之後勞工及福利局局長羅致光笑言，相信會同公務員嘅做法睇齊。目前問責局長之中，只有食物及衞生局局長陳肇始係女士，莫非何啟明係為對方爭取福利？

何啟明話，香港考慮產假等家庭友善政策時，只諗點樣平衡僱員同僱主聲音，但係就唔諗下呢啲措施有無鼓勵市民生育。港府雖然提出將產假增加4周，但5萬港元人工以上就只係局部補貼，提到「假如有下一個、另一個女局長，喺生育年齡嘅」，問政府是否認為不值得花大筆公帑，去補貼月薪逾30萬港元嘅局長生B。

羅致光之後特別點名回應何啟明，指何關心局長懷孕嘅安排，若果將來發生，相信一定會同公務員做法睇齊。